«Ձմեռային Վիքի ճամբար»-ի մասնակիցները հունվարի 10-ին հայերեն Վիքիպեդիան վիքիպեդիաների ընդհանուր վարկանիշային սանդղակում 42-ից բարձրացրել են 41-րդ հորիզոնականի։
«Վիքիմեդիա Հայաստան» գիտակրթական հասարակական կազմակերպությունը 14-20 տարեկան պատանիների համար հունվարի 7-11-ն Աղվերանում հնգօրյա ձմեռային Վիքի ճամբար էր կազմակերպել: Ճամբարի կազմակերպմանն աջակցել է «ՎիվաՍել-ՄՏՍ»-ը՝ ապահովելով բարձրակարգ ինտերնետ կապ:
Վիքիպեդիան ազատ բովանդակությամբ բազմալեզու հանրագիտարան է, որը ստեղծում են Վիքիպեդիա կայքից օգտվողները` ազատ խմբագրման ձեւաչափով։ Վիքիպեդիան համացանցում բովանդակություն տրամադրող կայքերի լավագույն հնգյակում է: Կայքն օրական միլիոնավոր ընթերցողներ ունի ամբողջ աշխարհից եւ հարյուր հազարավոր կամավոր խմբագիրներ՝ երկրագնդի գրեթե բոլոր անկյուններից:
Ըստ «Վիքիմեդիա Հայաստան» գիտակրթական հասարակական կազմակերպության, Վիքիպեդիան եւ վիքի նախագծերը դպրոցների եւ համալսարանների ուսումնական գործընթացի պարտադիր մաս են կազմում զարգացած բազմաթիվ երկրներում: Հայաստանում նման մոտեցում ձեւավորելու համար կազմակերպությունը նախաձեռնում է տարբեր միջոցառումներ, որոնց նպատակը համագործակցության շնորհիվ բարձրարժեք ազատ բովանդակություն ստեղծելու՝ վիքի մշակույթը տարածելն է, խմբագրողների կազմը համալրելը, գաղափարներով համատեղ ստեղծագործելու եւ վիքի գործիքներին արդեն դպրոցից տիրապետելու հմտությունները սերմանելն ու սովորեցնելն է:
Հավելենք, որ 2015 թվականին «Վիքիմեդիա Հայաստանը» նախատեսում է կազմակերպել 4 վիքի ճամբար, որոնցից 2-ը` միջազգային: Այս տարվա ձմեռային ճամբարի ընթացքում պատանիները հարստացրել են վիքիբառարանը, վիքիպահեստն ու վիքիպեդիան, սովորել են հայկական երգեր եւ պարեր, մասնակցել են ինտելեկտուալ խաղերի:
|